Lepa Kata

Izvor: Wikizvor
Prijeđi na navigaciju Prijeđi na pretraživanje

Pod orehom Lepa Kata
autor: Fran Galović
Kostanj




S polja seno diši,
     A črešnje so lepe, crlene,
Na nebu sonce gori,
     I listje se niti ne gene.

Kraj zdenca dogo stoji
     Z vedricom vre soseda Kata
I v zdenec nekaj gledi,
     Vedrica je v soncu ji zlata.

Crnina i zima i kmica
     V globokem zdencu leži,
A Kata i zlata vedrica
     Vu vročem soncu blešći.

Na glave je robec crleni,
     Kak jogenj žarki gori...
Pospani so oblaki leni,
     S podolja seno diši...