Vu tvojemu selu

Izvor: Wikizvor
Prijeđi na navigaciju Prijeđi na pretraživanje
Vu tvojemu selu
autor: Dragutin Domjanić




Vu tvojemu selu su skosmani krovi,
Al smeha je puno pod njimi,
Čudaj je tam pucah, od cvetja su lepše
Al najlepša ti si med vsimi.
Tam pri vas vse ceste tak pune su praha,
Al zato i mehko se hodi,
Obhajaju puti i bludiju steze,
A vsaka do tebe me vodi.
Vu tvojemu selu tak svetli je mesec,
I puno bi znal pripovedat,
Sigurno na spomenkih tebe bi videl,
Da samo se hoće ogledat.
Kaj danas to sunce, kad hoće se zgasit,
Gledi si po redu vu hiže,
Pozlati obloke, nalukne se vsaku,
Al tvoja od vsih mu je bliže.
Vu tvojemu selu kaj iskat je štelo,
Još v času, kad mora vre zajti?
Je l morebit pucu, kaj verno zna ljubit?
Nju nemre i nemre tam najti.