Virostovnik skoznujuči,
pesek v klepsidre tekuči
gledi cureti celu noč.
Z nuternje prorokujuči
biškupov Trijumf dojduči,
straži prez sna verzotoč.
Skoznujuči, malajuči
laži v Biškupov Misal,
kak kerv čerleni Inicijal,
zetkano razetkujuči,
dvojmba ga vu mozgu muči
da Biškup je Sardanapal.
Dalmatika brokatna,
benečki raknič,
biškupski ščap v roke
kak hijerozolimitanjski bič,
od sega v temu Religije ni nič.
Biškup je vražnji fičfirič,
znutra vočje lakom ftič,
kak stvoril da ga je hudič.
Penezolovec, škudolizec,
skupec, klafrač, sladobizec,
v Kronike kak dični muž
ostal bu taj grešni guž.
Falšno poživinčen zver,
taj zlatovusti zlatoper,
črez vatikanjsku prešel Dver,
kak Trijumfator Kardinal
bu v Rimu Pape kušlec dal.
Klobuk trojstručni papinski
ga kinčil bude istinski.
A on pak jalni žitkapisec,
prebende masne gladnuš, lisec,
tentolizec, vitiznanec,
gladni vlaškovuličanec,
žalosni knigar, prepisavec,
dijačkih verzov ziskavavec,
biškupske dike namalavec,
nesramnolažec, dvorjanski norc,
z terbuha govoreči škvorc,
gladnuš, jalnuš i kruhoborc,
skrovnopisec, računar,
černiložderec, zdeličar,
frule stropane piskač,
šipuš blatneh dostegnjač,
bogec v klupku čemernih kač,
klobukov tujih natikač,
kebrojedec, hračkolizec,
obšanitel, tentolizec,
virostovnik, stekli pes,
od hektike rascufan ves,
kaj celu noč ga grize bes,
bu krepal bogec bez penez,
brez blagoslova, brez nebes.
Ah, da je barem Lutoran,
na ognju peklenskom zežgan,
v roke noseč liljom cvet,
da vleče se črez svet spreklet,
popluvan, zbulan, zdruzgan smet,
na prangeru Poet Propet,
tak da je Atlas, Tverdostenec,
Pravice četernja i zdenec,
kinčil bi ga lavorični venec,
sem hipokritom bil bi vočji strah.
Iz vust smardlive duhe žmah,
nuternje laži gnjili dah:
se čarno kak posipni prah,
circumdederunt, pogrebni dah,
se pepel, greh i laž i prah,
merlički pot, mertvečki vzdah,
prežgana juha, pišivi grah,
molitve v vutleh sandalah.
A Biškup hudi, stranjski Lah,
dijakov vrag, kaptolski strah,
fratarski strah, mertvečki dah,
kotrigah trulih sperhli žmah,
se pepel, greh i smart i prah.
Virostovnik skoznujuči,
pesek v klepsidre tekuči
gledi cureti celu noč.
Z nuternje prorokujuči
Biškupov Trijumf dojduči
straži prez sna verzotoč.
