Konjic erarski,
konjiček, ždrebec, ždrepček,
saki dan solda, klobas,
saki dan topli hlepček.
V nedelu pak cafute,
v petek turski svetek,
harcuvanja banskog to ti je početek.
Al kad dojdu Gospodin Grof
Italo Hermengildo Izolani,
hahar nacifrani, kak vre jesu bani,
generali, venecjáni,
pak kad dojdu gladni dani,
gda se ne zna ni kaj ni kam,
niti ki kam, si bi sikam,
rascufani turski dani,
gda se ne zna ki kam kani,
sisečki dani, zbombardani,
prestreljani, razdrapani,
zabadave buš se križal
Jezuševoj slatkoj rani.
Spoznala ti bude tikva,
za sold Švaba da je hotel,
bogečki sold, da te fkani.
Gigerl biti vu sametu, septuh imet mezopani,
"camatato deaurato", "cimbaloto, pokay poto".
Al kad dojdu Gospodin Grof naš general Izolani,
kopito lizal išibrani ti buš, mulec zverbuvani.
S kremenjačom flintom, ti kanonsko meso,
spekel se buš v blatu, kakti jež pod Pleso,
z mošnjom i s cekini, z spreluknjano keso.
Na čeladi fakla, pancér, karabinjér,
ti, mulec božji, štimaš da buš oficér!
Mala Maša takšnih je metulov zežgala pet jezer,
General Praunšperger, hudi krobatožder,
se Turopolce je poklal, stekli pes i zver,
kak bogatuš, kavaler,
vrnul se je v Belveder.
Konjic, konjiček, ždrebec, ždrepček,
saki dan hleba, saki dan hlepček.
Za verbuvanku ranjčik, bogečki imetek,
čarnoga grudanjka pijani početek.
