Kanoni, orli, rukavice,
buzdoganji, horugvice,
oroslanjski parkli vugerske pravice,
tak je naš Verböczy
pisal Tripartitom.
S hahari i z členi, z galgami i z mitom,
z mehurom kak bedenj, ze stražnjicom sitom,
na hijerozolomitanjsku Lubav
namigavajuč pri tom.
Jazbec baronski! Pod tem je banditom
sedemdesetsedem jezer kmetov
z lobanjom razbitom
krepalo kak marha pod sudečkim kopitom.
Kak klobase vu mesnice,
svetom vodom z škropilnice
škropil je taj Gespen kmete, coparnice,
s kropom, z oljem, z žveplom, kervave vuhnice,
da su v nebu regetali si sveci.
Veliki i zmožni gospodin Verbeci!
Orsaški tarnikmešter krala Matijaša,
vučil je kmeta plemenitaškeg Očenaša:
od boga da je stvoren Kaptolom,
Konvent, Spravišče, Privilegijom,
Klauzula i Dekretom.
Gdo tak ne misli, z žveplenom
ga smolom trijeb je peklenom
zesmudit v pepel s pepelom.
