Smrklo se. Listje šumi.
Ostali smo sami pred kletjom.
Jogenj za kostanj gori,
Nagible se svetlo k oblokom.
Zađnji tu večer sedimo. -
Sprešano je sȅ,
Mošt je vu lagve, -
I kola zutra dojdo po nas.
Jogenj se žari. Gledimo,
Kak odhađa dim
I na vetru š njim
Jesenski dragi, najlepši čas.
Moj stari pipo zapušava
Morti vre deseti pot,
Kremena išče, okresava:
"Zutra moramo na pot!
Bog zna, je l' več gda
Tu bomo nazaj!"
Ja ga razmem i gledim.
"Bog zna, što to zna!"
Z jognja ide z vetrom dim -
Popevke je kraj....
