V megli (Po dragom kraju)

Izvor: Wikizvor
V megli (Po dragom kraju)
autor: Dragutin Domjanić




Megla se legla v gorice,
Suha se loza žuti,
Zakaj je bledo ti lice,
Kaj si žalostna mi ti?
Morti je sunca ti milo,
Ili ti grozdja je žal?
Sunce za oblak se skrilo,
Grozdje je otec tvoj bral.
Ili to senje su budne
Noćih odnesle ti mir,
Da su ti oči tak čudne,
Kak da v megli su zmir?
- Nemrem ja senjat nit' spati,
V suzah je vanjkuš mi cel;
Težko je, tužno to znati,
Drugu da dragi je zel!