V megli

Izvor: Wikizvor


Kervava megla v megli karvi,
kadaver v blatu,
v lobanji čarvi.

Zgorete cirkve, kervavi sveci,
dim, jogenj, megla, v megli mertveci.

V megli, v daljini, plač pesji, kmica,
bistrički bogec, bistrička bogica.

Tenja se vleče gluhe vlačuge,
dim, megla, v megli kopito kuge.
Galopjera kak stekla na mercini pastuhu,
v meglu, v kmicu, v daljinu gluhu.

Na štaglu, v seni fajtnega sena,
kak tenja tenje je šmugnula sena.
Škornje v blatu, sena još jena.
Megla. Tišina. Vremena meglena.

"Psst, dečki, čkomete, cito, citissime,
kirije eleison, na propele visime!"

"Pod baltu se bane i špane i kapetane
excellentissime i eminentissime!"

"Če se ne zdignemo, nigdar se ne vskrisime!"

"Tri bednja praha, plomba, puriflami,
Gurkfelderi dojti rekli su z nami!"

"Sejeno al si denes al pak zutra v jami."

Megla v megli. Megleni glasi v tami.
Kervavi akordi vu stubičke drami.