Uz put

Izvor: Wikizvor
Jump to navigation Jump to search
Uz put
autor: Dragutin Domjanić




Po lugu slaviček popeva,
Da najdalši čuje ga kut,
Po žitu se zlato razleva,
K topolam odputil se put.
I prešel bu on mimo vrta,
Kde v cvetu je bujnomu vse.
Tam vrata su meni zaprta
Tam vsi su me zabili vre.
I nikdo me poznati neće
I nikdo već dober mi ni:
Nit' rože v rondelah dišeće,
Nit' beli jasmin niti - ti.
Znam: ti si lepa i mlada,
A kaj ti ja morem da dam?
Al' če si me imala rada,
Naj nikaj te toga ni sram.
Ja srce ti imam bogato
I vnogi popevke mi zna,
A ti buš gizdava još na to,
Da rad sem te zmislil se ja!