Starinska

Izvor: Wikizvor
Starinska
autor: Dragutin Domjanić




Jezero v gaju cipresah.
Bistroj po vodi gizdavo
Labudi plavaju beli.
Nebo je plavo, tak plavo.
Ziblje se čun nad glibljinom,
Tiho je čuti gitaru,
Gaj od cipresah posluša,
Pozna popevku tu staru.
Poznaju blede te rože
Jezeru čisto na kraju,
Pozna ju mračna glibljina,
Plave daljine ju znaju.
Ona veli, kak je sladko
Imati rad, kaj ni smeti,
Onda sred rožah na valu
Zaspat: vumreti, vumreti...