Stara se nagiblje vrba,
Kakti da bi spala,
Topli letni dan je videt
Z vode kak z zrcala.
Oblak plava jen za drugim
Beli i debeli,
A na bregu mirni ljudi
V travu su se seli.
Dremlje voda, samo onde
Gde je kraj rukava,
Svetli val prek vala skače,
Teče šumna Sava.
Prešel poldan, greje sunce,
Voda vse trepeće,
Negdo je na bregu rekel:
"Sada kak da vleče."
Vsaki čas na vedrom nebu
Krič se zdigne vesel,
Ribič-tič kak bela strela,
Ribu je odnesel.
- Sunce tone čisto nizko,
V vodi je vre kmica,
Vse je dugša senca vrbe,
Vse su dugša lica.
Nebo je vu jednom ognju,
Tiči su po prudih,
A pred nebom silhuete
Črnih tihih ljudih.
