Malo je ko posve kuntenat,
judi su pegulani na razne načine,
u jednoga su možjani ka u tičice,
a drugi sliči na žabu iz kačine.
Niko je dežgracjan u jubavi,
niko u glavi jema črva,
nikoga po noći žena izgriza,
a nikoga po danu sekrva.
Nikoga uništi pusta đeložija,
nikoga pulitiške brige,
niko pati od titule i časti,
a niko na bubrige.
Niko ispod očalih bandogleda,
niko poteže upalu uha,
nikoga stiskaju postoli i kali,
a nikoga zaduha.
Nikomu dodiju himbeni susidi,
nikomu fažol i pašta:
nikomu fali komadić trbuha,
a niko bali svašta.
Niki se u maju napunidu brunih,
nike bi škropit vajalo,
jednoga oprudi mlada škrobutina,
a drugi ugazi u vajalo.
jedan upade u veliku dicu,
a drugi nema ništa,
prvemu su slabi bili računi,
a drugi je slabi makiništa.
Malo je ko posve kuntenat,
judi su pegulani na razne načine,
i nikad nesrića sama ne dohodi,
najdi se uvik i lipe začine.
