Po parku plaviju se pauni,
Trepeće im kruna na glavi,
Na granah glediju ih tičice
I rožice drobne vu travi.
A gore nad cmroki nad črnimi
Oblačeki beli su stali,
Iz njih su se dole zagledeli
Debeljkasti ajngeli mali.
I pauni plavi se gizdaju
I repe si širiju zreda...
Tak mirno je vse, samo negde je
Zadišala sladko rezeda.
Po parku je nekaj zašeptalo,
Vsi ajngeli z oblakov zgora
Nad tihu su stezu nagnuli:
- Markiza to ideju z dvora.
Ah, ja bi Njih nekaj rad pitati
Presvetla, prelepa markiza:
Visoki chignon Vaš napudrani,
Kaj smeti bi videti zbliza?!
Štel znati bi, je li zaistinu
Pod onim turničkom na glavi
I Oni si krunicu imaju,
Kak v parku ti pauni plavi?!
