Park med alejami

Izvor: Wikizvor
Prijeđi na navigaciju Prijeđi na pretraživanje
Park med alejami
autor: Dragutin Domjanić




Park med alejami,
veter med vejami,
lipa i kurija stara.
Sence se njišeju,
kakti da rišeju
slova zapletena, šara.
Oblaki zgubljeni,
zlatom zarubljeni,
golubi beli iz krova
vsi se zagledeli,
da bi zezvedeli,
kakva to čudna su slova?
Neznaju čitati,
nemaju pitati
koga, kaj to znamenuje.
Sence si rišeju
slova i brišeju.
Put poleg lipe putuje.
Sunce prigrejalo,
zlatom zalejalo
polja, kaj zlatna zreliju.
Park med alejami,
veter med vejami,
lipa i kurija spiju.