Nena kako se kruh zove

Izvor: Wikizvor
Nena kako se kruh zove
autor: nepoznat


Tri ižulane su otputovali s krivimi pasoši za Holandiju. Kad su prišli na most na Riki, jenomu je bila prva beseda:

- Mladići, sada 'remo, ma život smo klali na kocku.

A drugi je rekel:

- Gore leh doma nan ne će bit.

A treći, Andre, je zašviknul na njih, da se ne fermuju kako trubile.

Kad su prišli va Minhen, na stanici su više z moti no z besedami pitali, kada 're ferovija za Roterdam. Doznali su da kasno pa su se stisnuli va kraj, da čekaju.


Kako nisu jimali jis, poslal je Andre jednoga od njih da 're kupit malo kruha. I taj je šal. Andre ga s kumpanjen čeka i čeka, a njega ni, a brzo je partanca. Andre je najzada pustil kunpanja, da čuva robu i šel jiskat onoga, koga je poslal po kruh.

I najde ga va gradu, kako s rukami va žepi šeće sprid jene pekarije i gleda nutar.

- Frane, ča delaš, - strese se Andre na njega. - Ferovija će brzo poč, ča još nisi kruh kupil?

A Frane mu odgovori:

- Ja 'nenan kako se njemački reče kruh, pa me je sram poć pitat.