Nebojša

Izvor: Wikizvor
Nebojša
autor: nepoznat


Bili su stareji i imeli jedinca sina. Ovoga pošalju va školu, ale ni otel nikad vadit. Meštar ga je kaštigal i tukal i prez jila ostavljal, ale se to ne pomore niš. Mali se ni bal ni šibe ni katafića, ni meštra ni katihela, ni oca ni matere. Malo mu već bilo dodijalo, ale ne šibi, leh nagovaranje, pa zato pobigne od kući, da gre po svitu. Iduć tako po svitu nameri na jednoga gospodina, a to je bil đavol paklenski.

On ga pita:

- Kamo, mali?

A on onako sigurno odgovori:

- Grem iskati dobroga gospodara.

- Ti išćeš dobroga gospodara, - reče gospodin, - a ja dobroga slugu, hodi k mene služit.

- Grem, zač ne, al' znate ča, prvo leh van buden ča delal, morate me školi vadit mesec dan.

- Dobro, ja ću te sam školi vadit, leh hodi s manu.

I mali projde s njim. Petnajst dan gre va školu i već zna više od meštra, gre drugeh petnajst i već zna više od katihete. Sad reče mali sam sobun:

- Dosta san se toga navadil, da bin ja sad šal ća od toga gospodara - pomisli tako i valje pogibne prez gospodarova znanja.

Gre i nameri se na jednoga staroga. Stari ga pita:

- Dečki, kamo ti?

- Gren iskat straha, - odgovori mu mali.

- Kad je tomu tako, hodi va bližji grad, projdi sudu i tu te ti dat sto forinti, ako prespiš va jednoj gradine.

Mali projde va grad i valje gre iskat, kako ga stari naputi, sud i ponudi se, da će va toj gradine za sto forinti prespat. Oni mu valja obećaju, ako to učini. Došla večer, i on projde va gradinu i prespi nutreh. Došlo ga strašit, ale njega niš strah. Jutro dan projde sudu i pita obećaneh sto forinti. Oni mu je daju. Zame beči i gre naprvo. Dojde va drugi grad. Tu mu obećaju dvisto forinti, ako va njihovoj jednoj gradine prespi.

- Ču prespat, zač ne, leh mi dajte beči, - govori njin on.

- Dobit ćeš jutra, leh ti hodi tamo, ne boj se.

Borme on projde i va tu gradinu i prespi tu celu noć. Strašil je bilo tu sakakoveh, ča se god pomislit more, ale njeg ni ni malo strah. Jutro projde po beči i kad ih je dobil, otputi se naprvo. Opet dojde va tretji grad, i tu mu sud obeća tri sto forinti, ako bude va njihovoj gradine prespal.

- Ču, - odgovori on, - zač ne?

I večer projde tamo, ne projde spat, leh odluči, da će su noć bit na nagoh, pa projde pod dimnjak i tu sede. Sad se počelo od seh stran strašno rušit, z lanci kramat, škripat, prikazi se prikazivat, ale njega ni sejedno niš strah. On lipo leh sedi i se to gleda. Najedanput čuje se z dimnjaka glas:

- Padan, padan! A on reče:

- Kad padaš, zač već ne padeš?

I sad padu pred njega dvi čovičje nogi.

- Ej, bar ste mogli malo dalje past, ne justo pred moje nogi, da mi tu pačite.

Zame obe nogi i hiti je u kraj. Sad se opet čuje glas:

- Padan, padan!

- Kad padaš, a ti padi.

I sad padu pred njega dve ruke.

- No, i vi ste mogle malo dalje past, a ne baš pred moj nos, kade mi pačite - i hitil je, kamo je hitil i nogi.

Sad se opet javlja z dimnjaka:

- Padan, padan!

- Kad padaš, a ti padi, - govori on. I pade truplo čovičansko.

- No još si moglo bliže past, - reče on, - ča nimaš drugde mesta.

Zame truplo i hiti ga k nogan i rukan. I se se to skupa spravi i zalepi tako, da je bil cel čovik, leh ča mu je glava falela. Mali to gljeda pa govori:

- No da imaš barem glavu, bimo se razgovarali, da nam prvo vrime pasa.

Kad to reče, opet se oglasi z dimnjaka:

- Padan, padan!

- Ej, padaš, padaš, nikad ne padeš? Padi već jedanput, a ne jadi me, - govori on već zlovoljan. Kad to reče, eto pade pred njega glava i zaceli se z drugen telon i oživi. To bil čovik srednje dobi. Sad počme ta čovik govorit, da su tu blizu vrata i da je za njimi trinajst kamar, pa reče malomu, neka zame ključ, pa da te poć malo videt te kamari. Ale mali odgovori:

- Kamo si klal ključ, tu ga i zami i opri vrata, ako ćeš, ja se trudit ne ću, leh s tobun gren videt te kamari.

Čovik zame ključ i opre vrata od prve kamari. Sad govori malomu:

- Zami ključ od druge kamari, da vidimo i tu kamaru.

Ale mu mali govori:

- Kamo si stavil ključ, tu ga zami, pa opri sam.

I čovik zame ključ i opre sam. Dođu va drugu kamaru, pa govori ta čovik opet malomu, neka zame od trete kamari ključ, a mali njemu opet:

- Kamo si ga klal, tu ga i zami pa opri, mane se ne sila prigibat.

I čovik opre. I tako su jedan drugomu va seh trinajst kamar govorili. Mali je vavek govoril:

- Kamo si klal ključ, tu ga i zami.

Kad su bili va trinajstoj kamare, govori čovik malomu, neka zame kulju od konobi, da te nutreh sega nač.

Ale mali opet govori:

- Kamo si ga klal, tu ga i zami, pa opri sam.

Čovik zame ključ i opre konobu, pa govori malomu:

- Zami motiku i zakopaj triput, pa ćemo nać vina.

- Zami sam motiku, pa kako si vino zakopal, tako ga i otkopaj, - odgovori mali. Čovik zame motiku i otkopa tri bačvi z vinom.

- Daj mali, ta žmulj, da pijemo, - govori on opet malomu.

- A zami ga sam.

Čovik zame žmulj, natoči punoga vina i dava malomu neka pije.

Mali govori:

- Ti si stareji, pij ti prvo, pak onput ja.

Čovik popije i da drugi žmulj malomu. Mali borme popije se do dna. Sada mu govori čovik, neka triput udre z motikom, pa da će nać tri žari cekini.

- A ne ja, - govori mali, - leh kako si je ti zakopal, tako je i ti sam otkopaj.

Čovik je otkopal i govori:

- Vidiš, mali, ja sam bil tu zaklet, i ti si me s ten zbavil, ča si bil tako siguran i ča nisi otel niš v' ruku prijet. Ove dve žari cekini zami za se, a z ovom tretom plati maši za duši, ke su ovde poginule.

I sad se učini dan. Mali projde jutro s gradine, pa ni ni hodil po oneh tri sto forinti, ča mu je bil sud obećal; dosta su mu bile žari s cekini. Leh lipo projde doma k ocu i matere, pa još i sad s njimi žive i veseli se. I ja san bil jedanput pu njega, pa mi je to pripovedal, ale z žari mi ni niš dal.