Na Odri reki

Izvor: Wikizvor
Prijeđi na navigaciju Prijeđi na pretraživanje
Na Odri reki
autor: Dragutin Domjanić




Leken se kak da da potaplja,
Zmirom pod vodom se ziblje,
Hrasti šumiju od vetra,
Preprut pak komaj se giblje.
Gjurgjevke male v hladu
Tak si skrivečki dišiju,
Zvončeki beli zmed listja
Stiha si nekaj zvoniju.
Odra gliboka zavija,
Ni ju nit čuti, kak teče,
Samo se viri groziju,
Rogoz kak v strahu trepeće.
Kaj mi taji da glibljina,
Kaj kukovača me zove?
Štel bi tak rad se počinut,
Leći med lekene ove...