Našva draga, našva dična,
oh, prilika vazdar srićna,
nimam, veruj, vekšu radost
neg razmišljat tvoju dragost.
Premda sama izgizdivaš,
zlatom, srebrom prosvitivaš,
još ti kinće pridodala
ruka lipa ka t' vezala.
Nisu moje, znam, vridnosti
moć zaslužit te milosti,
al se sunce s tim poznaje
da jednako svitlost daje.
Zato sebe ne procinjam,
diku tvoju neg zazivljam:
ti me včini vridnom biti
kinća takva pronositi.
Našva draga, našva dična,
oh, prilika vazdar srićna,
polag srca se nastani,
z ufanjem ga, prosim, hrani.
