Mu je lipo tornala
| Mu je lipo tornala autor: nepoznat |
Nika Mare šla je s kampanje z brimanom bambarušine na glavi, s torbicu na rameni i s kuneštru smokav na ruki. Još je morala i kozu za sobu potezat ka se je kraj sakoga grma fermivala.
A bila je vela toplina tako da se je brižna ženska jedva rivala naprida.
A sprid nje je hodel Frane z rukami na škini i gonil tovara z brinčacem magriža.
- Susedu Frane, - zamoli ga Mare, - zemite mi na tovara torbicu i kumeštricu, ne moren više naprida.
- Ne smin suseda, više niš na tovara klas, moran ga gledat, - odgovori njoj Frane i krikne na tovara da se brže movi.
Mare je kako oparena ostala na puti i dobro mu zapametila. Čekala je na miseci, da mu torna milo z drago. I prišla njoj je prilika.
Jenoga jutra, napunil se je nje brod z judi, parte na Prnibu. Jušte su se molivali s kraja, kad po klančiću sused Frane i počne jih zvat:
- Čekajte malo, zemite i mene priko.
Veslači su stali, ali se je Mare nastavila na brodu i javila:
- Vozte daje, a vi susedi jišćite drugi brod. S nami više ne morete, znate kako je, i brod je gledat kako i tovara.
Na brodu je nastal se jedan smih, dok su se deštakivali s kraja, na kon je sused Frane kako trubila ostal z otvorenimi usti.