Metvica

Izvor: Wikizvor
Prijeđi na navigaciju Prijeđi na pretraživanje
Metvica
autor: Dragutin Domjanić




Metvica mehka z mejaša diši,
rosa se trusi, na vetru suši,
ja sem ti sam, kak i bogec sam.
Travu su v jutro pokosili,
dragu su drugomu sprosili,
skoro i dalko odišla bu, znam.
Sladko zagukal je grlicah par,
ti mi nigdar se ne vrneš, nigdar,
drugi bu dragal tvoj svileni pram.
Oblaki kmični se zbiraju,
nebo i sunce zastiraju,
v srcu mi tuga i čam.
Metvica vehne i težko diši,
vse nekaj čeka. Taj mir me duši.
Ja sem ti sam, kak nigdar još, sam.