Lipe

Izvor: Wikizvor
Prijeđi na navigaciju Prijeđi na pretraživanje
Lipe
autor: Dragutin Domjanić




Snoćka su lipe zadišale
Sladko pri mojem obloku,
Snoćka su oči mi čitale
Ljubav vu tvojemu oku.
Cveti se novi odpiraju,
Čele se žuriju zlate,
Želje mi k tebi se zbivaju,
Zmirom sad mislim ja na te.
Tak mi od lipah dišiju vse
Tajne i sladke te noći,
Tak mi daljine plaviju se,
Kak da vse tvoje su oči.