Lamentacija o štibri

Izvor: Wikizvor

PAVLU ŠTOSU HORVACKEMU VITIZNANCU KI KIPA DOMOVINE NI SPOZNAL NI PREPOZNAL


Došel je kumer s kurnriči,
prišel je kumek s piliči.
Za štibru donesel je klobase,
miš mu je pole popasel...



Falen budi Jezuš Kristuš,
lubim Jim rukice, Poglaviti,
sluga sem pokoren,
kaj smem k Njimi priti?

Sem došel, bogme, štibru platiti!
Graščicu gradsku Grajaninu.
Prebendaru pak mletvinu.
Gospodinu podimčinu,
pohižninu, ognješčinu.
Magistratu maltarinu,
tovar, tlaku, govedšinu.
Velečasnom presvalščinu,
Kapelanu martinščinu.
Cimtorijumu osvalščinu,
rokovnicu, žirovinu.
Varoškem Sucu sajamninu,
maltarinu, kerčmarinu.
Kaptolomu brodarinu, tičarinu,
a bogme i dervarinu!
Dominalnem Gospodinu
hižni ranjčik: škuda cvancig,
urbarijum arenjdalski:
vagan jajca, sedem janjci!
Kontraktušu terezjanjskem
tri šonkice, rizling lanjski.
Zemalskome Gospodinu
pašarinu, ciglarinu,
lugarinu, ribarinu,
lovne cucke, tersovinu.
Za činž Grofu desetinu,
harač zlatni: tri forinte.
A Pisaru gusku, forint,
za tri kapi čarne tinte.
Za vuzemski liter vina
sedem grošov pajcovine.
Orehov vagan za aldomaš
vekovečne odvetčine:
Repudiare, Aspernari,
kmetska tikva se pokvari.

Porkolabi i drabanti,
kastelani i vahtari,
kaputaši i mežnari,
dacari i kapetani,
porez, dače i procente
kmet dužen je još od lani.

Prebendari, kancelisti,
kaprali Kompanije Christi,
kancelari, generali,
veliki i mali krali,
Sardanapali i fiškali,
klajnja Jim se mužek mali.
Kušuje Jim vočje stope,
kervave kaple ž njega škrope.

Lubim Jim rukice najponiznejše, Presvetli,
štibra nas jaše kak Hudi na metli.

Sluga sem pokoren, Prepoglaviti,
kaj morem ž Njimi v kancelarije biti?

Prosim Ih kak Boga, Preuzvišeni,
s tim činžum za živeti, bogibogme, više ni!

Naj zemeju na znanje, Velemožni,
da mi sme lojalni, pobožni i podložni!

Kistijant Jim želim, Gospon Grof,
se moje je Njihovo: moj žitek i imetek,
moj lov i moj krov!

Pozdravlen budi Jezuš, Gospon Velečasni,
z luknom sme letos opet malo kasni.

Naj samo zapišeju to, Veleučeni:
bili sme globleni, zaperti i tučeni!

Gladni smo kruha, Magnifice Domine,
za cipovom belim nam curiju skomine.

Oprost od činža Ih prosime, Uzoriti,
od Vuzma nijemput nigdar sme ne bili siti!

Zakaj opet, lubleni Illustrissime,
na špangi kak klobase visime?

Zakaj čepime v gajbi, dragi meštre?
Čkomite: sad nas buju deli na benečke kleštre!

Po nami se Njihovo Gospoctvo
vre dugo špancira,
za kmeta ne neg peklenog kristira.

Oni su z nami jako hudi, dragi Gospon Špan!
Na Markovem Placu sedi kervavi Biškup Ban!

Kmeta su Dožu kmeti rastergli
ze zubi kak cucki.
Naj nam rastolmače: kaj je i to bile lucki?

Biškup je Gubca spekel kak goluba v rajngli,
a Biškupa su v nebo na vanjkušu nosili ajngli.

Zakaj ni bil krotek i priklonit kak se šika,
kak puž nek bu muž, a ne kak rogi bika!

Pogleč Gospočiju, Poglavitu i Velevažnu,
kaj te ne oberču na činžu kak vola na ražnu?

Vrag ti nosi znanost, doktore, magistre,
bolše vrači naša Mati Božja v Bistre!

Oni su naš Gospon, Patron, Plemenitaš,
dobročinitel dobri, kak dobri Otec Naš!

Presvetli, Preuzvišeni, Veleučeni i Poglaviti,
kaj smem tri čebra srebra kak štibru platiti?

Sina sem prodal v Ameriku, na Javu,
tri čebra srebra za glavu kervavu.
Sina sem prodal v meglu, v tuđinu,
od pijavki da platim desetinu.
Sina sem poslal v sedmegodišnji rat,
v ratu sme krepali vre tulko krat,
da bi nam Cesar mogel dobre spat,
naš Lubleni Cesar v svoje hiže carske,
a mi pak pri naše šesnaeste
varaždinske, belovarske.

Varmedjije Sucu sem dal kobilu Micu,
i dva talera za gornicu.
Valaš talera za valovnicu,
a tlaku peške dana tri ozgora:
to su još iura regalia minora.
A gdi su aldomaši i mito sake fele,
za žaklec carske porezne tabele?
Kuruzu i lanjski vinski desetek
za tega vraga sem dal na dospetek!
A gdi je još biškupska alamižna,
cerkveno lukno pak potreba hižna?
Korpu jajec i sedem kokošek
dal sem na Miholje za regrucki strošek.
Na kotaru pristav fučka kak ftiček,
da muža oguli za kmetski pretiček.
Štibre naturalne i banderijalne,
arende, prebende, rokovnice farne,
se to su muke kak čarni beteg čarne.
Se bi to negdi jemput trijeb bilo
nekom rastolnačiti:
da nemre kmet plačati kad mu penez ni.
Ar zato, bogme, tolnačnika ni.

I tak kumek s korpum i s piliči
saki dan na našim vratima zvoni.

Lubim Jim rukice, kaj nebi malo sliv,
grunt nam je na bubnju,
vrag sam zna gdo je kriv?

Naj zemeju, prosim Ih, prelijepe mušanke:
korpu za banku, korpu za pol banke.

Naj zemeju, Gospa, jajec prepun koš.
Tri vagana još za jen pišivi groš.