Vu dne čalarne, sardite,
Burgund Drugi Papa zbetežal je
i preklel se nas grešnike.
V Budimu Kral vmorjen be,
vu stolnoj cirkvi na skolkam se
obernul kak krap v ponjve je,
pogreben poterbuške je.
Glas čujte kervave Kronike,
vu dne čalarne, peklene.
Den Serditi, Serditi Den,
mertuk je greha prepolnen.
Pod Silvestrom Đemantnem
i Jagelonom vugerskem
kobilica je požrla nam orsag,
a ovsenjak je drag kak kamen drag.
Varoški Sudec je postal hudi vrag,
trideset bab je pribil na prag,
trideset bab je nabil na ketač,
kuga i jogenj, pozoj i plač.
Vogerski kiral, Andrašov sin,
obesil se je na babji perčin.
Bez košnice, kak tožni pčelec,
po svetu blodi pogorelec.
Januš, Izabelin sin,
zežgal je varoš Varažlin.
Zežgal je sultan Novi Zrin,
Petrinju, Sisek i Bužin.
Potom vernu se domòm,
v muslomanjski Imperijom.
Pius dvestotrizdrugi Medicez
prodal je tijaru za vagan penez.
Barbarossa Hajredin,
tolvaj, pirat, mujezin,
admiral i hahar, afrikanjski knez,
Famagostu, Maltu i Ciprom ves
reskervaril je kak stekli pes.
Dan Majke Marije Svečnice,
v Tahog Ferenca Stubice
simtama smert, postekleli zvonar,
muž se je s kanoni spremil na Szomszedvár.
Dan Majke Marije Svečnice,
vu dne čalarne, serdite,
mertuk greha prepolnen be.
Elijaš kmet na Celje gre,
a Gobec-Beg z baltami pak za breg,
zima, megle, zvonovi i sneg.
Kervavi Fašnik joka od Klanjca na celjski breg,
zažvaleni kak marha, gladni kuružnjaka,
po snegu blodiju muži, bubenj mertvečki ruži,
znoreli šent z dijabli čarnu mašu služi.
