Koze

Izvor: Wikizvor
Jump to navigation Jump to search
Koze
autor: Zlatan Jakšić




Kad je izaša zakon od Šumarije
da se svaka koza vada ubije
nestalo je na Braču alegrije.

Ma komu je moglo napamet past
da se na Braču ne smi koza past
i da će država radi tega propast.

I ko može taki zakon da posluša,
kad sama Jadrina Roguša
vridi ka najžešča mlikuša.

Pa koza u Tonke Karigete
nikad učinit dinara šćete,
a možeš jon mliko rizat na fete.

Pa ona u Bepota Mončića
ne žere nego malo kića,a leže po tri kozlića.

Na Braću ostat bez koze
bilo ka bez masline i loze.
i tukalo bi posve rebanbit
za kozu svoju naglo ubit.

Pa onda radi te velike priše
da ti koze nimaš više,
da obališ baraku i zagon,
a da se dogodine promini zakon.

Da se zapiva kozi čast
i slava
i dika,
ma pokle si osta i bez nje
i bez kozlića
i bez mlika?!