Jesenski veter

Izvor: Wikizvor
Jesenski veter
autor: Fran Galović




Najempot naglo, kak da bi kaj zrušil,
V noči se je odnekud k nam zabušil
I obišel je klet,
Ves razpotan i spet,
Zaletel se je, stal,
Kam dale? Neje znal...

Mi poslušamo... Vre na kraj brega tam
Čez pola ide, a ne zna kud i kam.

Mir je v kleti,
Temno sveti
Lampica. Mošt nam curi
V čeber. Kočnica skeči.
Prešpan pritišče
Grozdje i stišče.

Moral bi stati,
Mošta zlejati,
a ne če mi se, tak sem pospan...
Još samo malo – vre bo zlejan,
Baš nekak lepo tenko curi...

Striček popeva,
Peč se razgeva...
Za čas nazaj nas veter zbudi.