Inje (Kipci)

Izvor: Wikizvor
Jump to navigation Jump to search
Inje
autor: Dragutin Domjanić




Vsigde je inje posipano,
Beli blisiče se bor,
Cesta vu snegu med lipami
Žuri pred stari se dvor.
Krov od starine počrneli,
Kak da prek noći je sed,
Po arabeskah glicinije
Biser drobi se i led.
Mutni obloki su, dremljeju,
Komaj glediju vu svet,
Pokri je čudnimi rožami
Mrtvi od leda ih cvet.
Vrt je zapreden vu meglicu,
Vsikud je inje i mir,
V šašu nad smrznutim jezerom
Bôgi drhturi satir.
Al se najenput zasvetilo,
Bole zaplavil se dan,
Mutni obloki se zbudili,
Svetlo glediju si van.
Inje je počelo živeti
Z vejah se trusiti vsih,
Kakti da čuje se šeptanje
Smeh još pritajen i tih.
Sunce je lipe zalejalo,
Dvor je pozlatilo star,
K jezeru ravnom i sklizkomu
Žuri za parom se par.