I. Nedelja

Izvor: Wikizvor
Jump to navigation Jump to search
Nedelja
autor: Dragutin Domjanić




Cirkva još zdalka se vidi,
Stara je leta i leta,
Grobje vu njezinoj senci
Puno je tuge i cveta.
V cirkvi je kip Majke Božje.
Bogec ga zna i bogati,
Ona za vsih ima srca,
Ona je vsakomu Mati.
Zvoni na mašu zvoniju,
Narod pobožno dohaja,
Vsigde se ćuti Nedelja
S kraja do dalkoga kraja.
Javlja ju škrlec pod nebom,
Slavi ju šuma i polje
I ono sunčece žarko,
Kaj si gledi Turopolje.