Horvatov szloga

Izvor: Wikizvor
Jump to navigation Jump to search

Horvatov szloga
autor: Ljudevit Gaj
Gdjegdje i Horvatov szloga y Zjedinenye.

Izvor: Danicza Horvatzka, Slavonzka y Dalmatinzka, Techaj I., Dana 7. Szechna 1835., Br. 5., Str. 17. i 18.


H O R V A T O V    S Z L O G A
y Zjedinenye za szvojega vszelyublyenoga Czeszara y Kralya FRANYU I. proti Franczuzom vu letu 1813.


Josh Horvatzka ni propala,
Dok mi sivimo;
Viszoko sze bude ztala,
Kad ju zbudimo;
Ak’ je dugo tverdo zpala,
Jachja hoche bit’,
Ak’ je szada vu sznu mala,
Che sze proztranit’.

Vechkrat szenya chudne szenye
Szladke radozti,
Kada sze joj kasu tenye
Jake mladozti;
Drugda pako magle czerne
Nyu obztiraju,
Kada szeztre nyoj neverne
Nyu zapiraju.

Jenput vidi Supaníje
Szve ponovlyene,
Ztare szlavne szve Baníje
Znova ztvorjene;
Vidi, chuje Gorotancze,
Krajncze dolazit’,
Y z Horvati nepreztancze
Tako govorit’:

„Hoj Horvati, bratyo mila,
Chujte nashu rech,
Neche nasz razdrusit’ szila
Bash nikakva vech;
Nasz je negda jedna mati
Drága rodila,
Z jednim nasz je Bog joj plati!
Mlékom kojila.

Kako chemo majki bolye
Szad zahvaliti,
Kak da bumo jedne volye
Sze zjediniti;
Jal y nazlob nyejne szine
Szu razdrusili,
Ztare szlavne Domovine
Diku zrushili. —

Ni li zkoro zkradnye vreme,
Da nyu zviszimo,
Ter da ztranyzko tesko breme
Iz nasz baczimo;
Ztari szmo y mi Horvati,
Niszmo zabili,
Da szmo vashi pravi brati
Zlo prebavili.“

Jenput chuje szvoje szine
Glasno pevati,
Szlosne glasze u viszine
Tako zdigati:
„Bratya danasz kolo vodi,
Danka szvetkuje,
Horvatzka sze preporodi,
Szin se raduje!“

V kolu jeszu vszi Horvati
Ztare Dersave,
Ztarom’ Kralyu verni szvati
Z Like, Kerbave,
Krajnczi, Stajer, Gorotanczi
Y Szlavonija,
Zkup Boshnyaczi, Iztrijanczi
Ter Dalmaczija.

Vszi Horvati sze rukuju,
Y zpoznavaju,
Iztinzki sze szad kushuju,
Réch szi davaju;
Neka znaju szvéta puki
Nyihov novi zvez,
Hvalit cheju vnukov vnuki
Szlavni narod vesz.

Nudar bratyo. chashe z vinom
Szad napunite,
Zdraviczu Horvatzkem szinom
Vernem napíte,
Neka sive nasha szloga,
Vszaki pravi Szlav,
Pravi szinko Roda szvoga
Neka bude zdrav.

Szada pako estre meche
Vszi popuchite,
Ter sze v techaj dobre szreche
Bratyo, zruchite,
Nut za Szlavu Otcza Franye,
Haid da vumremo,
Austrianzke Hise Ztanye,
Da podvupremo!

Kada mi orusje jaszno
Vu zrak zdignemo,
Tudyu szilu rano kaszno
Na tla prignemo;
Za dom nash y za Czeszara,
Sze aldujemo,
To je krepozt dedov ztara
Kú postujemo. —