Harceri harcuju,
henkari hoheruju,
ostrugari hatmanima
alamanke kuju.
Kolduši, lazaroni, tolvaji, latroni,
za halavanjom harca sa se banda goni.
Pod Petrinjom vezda smudiju kanoni.
Krabonosi, larfonosci, zaškrabani krabulniki,
bargamina, bumbačina, azardum i lumpačina,
Ahileši slavni pri peharu vina,
Marsovi kaprali kraj ognja komina.
V pekve prasetina, v gubcu teletina,
patuljčeci kak bažulki,
tak lumpaju ti perdulki,
zavrčki, patulki,
valonski smerdulki,
švapski pobedniki,
žolduši i plačeniki,
dežđevnjaki, niščeniki,
kaj ih natiravlu kak guske na piki
kurdistanjski koplaniki.
Tak zglediju naši hofmejstri, sojuzniki,
v kardinalske kikli carski poslaniki,
kaj glavu bi slavonsku najrajše na piki
v Inšpruk fkrali, prokleti coparniki.
