Grozdje

Izvor: Wikizvor
Prijeđi na navigaciju Prijeđi na pretraživanje
Grozdje
autor: Fran Galović




Bregi so se zlatom pozlatili,
     V crlenem listju rosno grozdje spi,
Grozdi so se zmed redov poskrili,
     Čehulka samo gdegde van gledi.

Kraj brajdešev stara je imbrina,
     A šipelina dole pod črešnjom,
Kraj staze debela je belina,
     I preplečo se tri muškati š njom.

Saki trs je ščvrkljen i prigible
     Sto let vre staro glavo do zemle,
Lozje se na kraj kolja leko zible
     I listi komaj na njem se drže.

Nabral sem škrilaka vre ponoga,
     I med crninom muškat se žoti...
Dalje idem, staza je još doga,
     V škrilaku grozdje vu rose još spi...