Galanćeri

Izvor: Wikizvor
Prijeđi na navigaciju Prijeđi na pretraživanje
Galanćeri
autor: Zlatan Jakšić




U prošlo vrime bilo je puno galanćerih,
prodavali su robu po škojiman sviman,
a judi su činili sapun od kauštike
i veživali gaće trajinan.

Sad judi nosidu moderne kajiše
i peredu zube, i sela su bogatija,
a starih galanćerih nima nidir više,
nesta je Mate, izgubi se Matija,

i ne zna se di je ni kud je,
ni je l' sa kujon, ili je bez kuje,
ni di su oni drobi,
u kojon garderobi.

Ma nisu galanćeri propali u botu,
niti su zaboravili ove naše škoje,
samo su sada prominili rotu
i ukrcali se u konvoje.

I neka jin je tamo boje i bogatije,
vratit ćedu nan se opet Mati Matije;
jer više vridi za našega Matu
jedan dan u svojen zanatu
nego sva Njemaška da je u suhen zlatu.

Pa onda ote imbuje
i ote kuje
nisu samo da se trguje,

nego su drobi
posli nike dobi
čoviku – i hobi.