Bogečka

Izvor: Wikizvor
Prijeđi na navigaciju Prijeđi na pretraživanje


Peklar pekla
od groba
do pekla.

Kolduš prosi,
kak pilko
skolke nosi.

Fehtar fehta,
moli
pišivo zerno soli.

Bistrički bogec
je baron,
na sprevodu mu
zvoni zvon.

Proštenjari slepci
za vuhom su
tepci,
pune rogožare
s pereci i s hlepci.

Ti imaju žlice
i juhe poldanice:
na klošterski vrati,
bogečki magnati,
ričeta se saki
kak mlatec
namlati.

Harmonikaši, mužikaši,
pred cirkvom z očenaši,
pune patakune, krune, marijaši.
Božji dar je bogečki ščap,
za soldom sold,
za kaplom kap.
Tu v mulu i v blatu,
v ognu i v ratu,
gre nam kak tak.

V bogečkom nebu,
na pervom katu,
čeka nas kinča,
pun škrilak.

Tam peče za nas vola,
kod božjega stola,
gospon baron Lojola.