Ballada

Izvor: Wikizvor
Ballada
autor: Dragutin Domjanić




Kiša šumi čez jalšinu i šaš,
Kde je moj dragi, ti šuma, kaj znaš?
Mraki se zbiraju, v klanjcih je noć,
Kam je tak dal'ko odišel on proć?
Kiša curi, da vse pute mi sprala,
Šuma šumi, bum zabadav ga zvala.
Trga mi telo i opravu trn,
Svrži su pram mi razpustile črn.
Ruka mi draga moj obraz tak bled,
Rukica mrzla, il' veter kak led.
Kaj se to zmirom iz ribnjaka plače?
Ili to samo je glas kukovače?
Kiša šumi, pod listinom ni dna,
Kak je vse glibša šuma mi ta.
Kaj mi je mali siroček bil kriv?!
Pak je čut' plač. Je morti on živ?
Kam sem ja zašla? Vre voda me davi,
Nebu taj srećen, ki dragu ostavi!