Kad smo včera orali,
Kaj smo stati morali?
Nekaj nam je reklo: "Pazi,
Tiča ne pogazi!"
Kad smo se ogledeli,
Tičeka pogledeli,
On je zapopeval taki
Nebu pod oblaki.
Kaj ćeš kreljut grejati
Ili nam se smejati?
Kam ćeš tiček tak visoko,
Nit ne vidi oko.
Nam je težko plužiti,
Nikam se ne tužiti,
Lahko ti se smejat v zraku
Mužu siromaku.
Ili dok mi oremo,
K nebu dojt ne moremo,
Ti nam zgora sunca prosiš,
I veselja nosiš?
Ni tam lepše sedeti,
Z neba dole gledeti,
Zakaj ti se ostat ne će,
Kaj te k zemlji vleče?
Kaj se moraš vraćati,
K grudi toj obraćati?
Čeka tebe, znam ja, tica,
Draga pajdašica!
Tu ste gnezdo delali,
Mlade v polje pelali,
Kak i vas su stari znali,
Dok ste bili mali.
Morti je i vnogi kraj
Lepši, neg je bôgi taj,
Ali dom je dragši, je li,
Neg i svet taj celi?!
