Kdo ti je rekel, da tiho trpim,
Da je i suzah za smehom mi tim,
Da su mi dani kak v megli od tuge,
Da su mi samomu noći tak duge?
Tvoje popevke to meni veliju,
One me v srcu boliju. -
Kdo ti je rekel, da imam te rad
Leta i leta jednako kak sad,
To, kaj sem tajil i samomu sebi,
To, kaj nit' tebi povedal bil nebi?
Tvoje su meni to odale oči,
Tam je vse čitati moći.
Kdo ti je rekel, da ljubit ja znam,
Da moje srce kak ogenj je sam,
Da bi i ti onde zgoreti znala,
Ti moja rožica, ti moja mala?
Tvoja to usta bez rečih poveju,
Kada me kušnut ne smeju. -
