Jedan bude pravi redikul,
ali ga judi izuzmu.
a drugi ne bi mora bit redikul,
ali ga za redikula uzmu.
A trefi i čovik bitar
i zna svakega belaja,
pa na zadnju sam od sebe
učini karnevaja.
Tako se izleže redikul
koji služi ka artišta,
a bude u za nj i radikul
koji bidan ne zna ništa.
Pa onda oni redikul
koji bidan ne zna ništa
judi nasilu hoćedu
da jin on bude artišta.
A jopeta redikul
koji je pravi artišta
na sve načine ga išempjadu
da na zanju ne zna ništa.
Da redikulih nima,
tribalo bi se za njih borit,
pa ili ih stvorit,
ili radno misto otvorit.
Jer je boje da i selo propade
nego obićaj i fešte
i boje je imat redikula svoga
nego se ozirat na furešte
(koji u selo dojdu od fešte do fešte).
Pa hoće l' on kukurikat ka pivac,
hoće l' hodit ka patak –
glavno je da ostane divac
i da prima «dječji dodatak»
.!
