Kroz ova dva miseca zna se ča ga čeka:
stivavat butilije prošeka
i falivat leka,
i govorit kako sve na njega diluje,
i da očiman svojiman propja ne viruje,
i da koga Bog miluje
va'da ga digod i siluje.
Prvo mu je silovanje
da moli u batisteriju Virovanje
i držat goruću sviću
za malega Mićela ili Miću,
koji bi se kasnije zva samo Miće
da mu kum iz Amerike ni užgima sviće
i da ni izvadi takujin repete
kad je pop govori: Otvori se Efete,
i pojdi u Božjemu miru!
Kad sutradan, opet je u piru
i jopeta prvi na tiru.
Jer su mu rekli za to pirovanje,
da su čekali samo na nje,
i da ova ceremonija
od svetega matrimonija
ne može bit bez njega
koliko ni bez pirne mise.
Ka'da su njemu razbumbale sise,
i ka'da je on za ovo vinčanje
dove nevisticu u blagoslovjeno stanje!
I još nevisticu ni Bog pokara,
a već su doveli biskupa iz Fara
i pokrili banke isprid oltara,
ne da ćedu na njiman šantoće spavat,
nego popi dicu krizmavat,
a kumi lemozinu davat
i spazmavat.
A spazam je kako va'da opašu
svaku krizmanu glavu u fašu
i kako za vezat lipo kurdilu
čovik va'da bude žvelat na riči i dilu;
a potriba je parićat i duplu fašu
ako namisto glavu napipadu grgašu,
koju va'da uduplo pašu
i učinidu gašu.
Jerbo i te grgaše
nisu iz Raše,
nego domaće, naše…
i svoju mutriju
niko ni dobi na lutriju,
pa čovik ako kumuje,
va'da uzimje redon
i glave i muje…
I onda mirno putuje.
A pri partence ide se kumparu javit
i reć da je svršila Mare zavit,
da život teče daje…
i dobra noć ko ostaje…
i Bog zna hoćemo se više kada…
jerbo i Doloru vridnost pada,
a nisu više sigurni ni reoplani ni korabje…
samo daj Bože zdravje!
(i od miša jaje,
i od buhe pleće,
da kumu ostane veće).
