Svi su penzjoneri isti
ča se tiče kapota,
nijedan ne će da ga obuče
samo se s njin zamota.
Jedni to radu od srama
zaradi starinskega kroja,
a drugi da bi jin se vidila
kadena od areloja.
Treći, malo stariji,
kojima špaher slabo kuha,
va'da nabiju u žepu kruha
da obid bude siguriji.
Zato se kapot priko škine tumba
da se ne vidi žep kako je razbumba.
A oni najstariji
drage voje bidu kapot obukli da je i dupli,
ali njiman su još odavno
svi botuni pukli.
