Galženjačka

Izvor: Wikizvor


Firu - firu, firula,
pod galgam žvegla
žveglica.

Firu - firu, firuli,
na galge bumo
došli si.

Škerlaček nosim na hendek,
dežd z vetrom mi je
kepenjek.

Al kerščenik, al copernjak,
pokopal nas bu loterščak.

Od se dobe za navek
jedini su galge lek.

Od se dobe do na kraj
karv bu tekla vekomaj.

Z tega pekla ni nazaj,
bogcu galge, grofu raj,
čerleni maj, kervavi maj.

Firu - firu, firula,
pod galgam žvegla
žveglica.