Carmen antemurake sisciense

Izvor: Wikizvor
Prijeđi na navigaciju Prijeđi na pretraživanje

ALI HARC POD SISEČKIM TURNOM

A. D. 1594



Pod banskem Siskom kanon
turski larma,
vonjha po kervi žveplena
pesja sarma.

Smudnik se smudi, garme haberdari,
komorhanski zelenki za praha pet funti.

Markaja banjalučkeg kerstiju na lunti,
vrag je serbus rekel sakoj muškoj punti!

Patancija kubuza, najvekšeg zidoderca,
na Gradu je kak perca potarla sa dverca.

Blisiknil je ognjanec buzdoganjec vatroserca.
Se su fane, paviloni, kak metuli vu gunguli,
zapahale na bandjeri buzdoganjske pomoranče,

kaj kak banski đemant blišče
poverh banske slavne lanče
na sisečke kuli.

Se su fane i standarte, kak zumbuli v krampampuli,
zaperhale kakti ftiči..
Turopolci, Mikuliči, Goričanci, Majetiči,
janjičare krope z oljem, fašeraju z bičkom, z biči.

Si barjaki i horugve beložoltega krentuha,
se hotnice i haubice, taraske, pomenjše štuke,
ftoplenikov jezeripol, na gaudijum savske ščuke,
se se dimi, damfa, kuha,
teče Kupa masna, čarna,
kakti od kolinja juha.
Krepalo je v puriflamu
jezeripol eunuhov,
jezeripol valižnikov,
tristo vezirskih pastuhov.

Masnice rane kak mozuli guste,
kervave klobase na soldačke kapuste.
Marijaši, patakuni, guldinerov bednji puni,
Hasanovi čebri kinča si su vaši, gdo se buni?

Arnautke, kufernjače,
beglučkinje, harcuvanke,
daničkinje diljke divje,
pak kinčanke tataranke,
zežgal se je lagum na bednjanske flanke,
letiju lobanje kak šindrove planke,
javkale buju cure Stubičanke.

Jen martoloz je kakti sred pijanke
zapeval o ranke dunje karamanke.

Tocijanke tanke,
lajeju flamanke,
komorhanski purflam lumbarda črez kalun,
oršovanjski globuš plava kakti čun.

Cesarska štuka dunka, misirski garmi klun,
žvepla, ognja, praha, straha je človek pun.

Kak bi se kmet zvlekel z tega sega vun?