Sneg pred Vuzem

Izvor: Wikizvor
Sneg pred Vuzem
autor: Dragutin Domjanić




Pun glavobolkah je lug,
puna fijolicah trava,
kaj se je zmislil taj sneg,
da si sad pak poprhava?
Zemlja od sna se budi,
čekaju pupki na grani,
noć si slavička želi
sunčeca toploga dani.
Zime je bilo vre dost
v mesece kmične i duge,
vsaki veselja bi štel,
dost nam je zime i tuge.
Vuzem pred vratmi je vre,
on se i v srcu nam javlja,
kaj će sad zima i sneg,
Vuzem se suncem pozdravlja!